ভাৰতীয় বায়ুসেনাৰ মূল কাম হৈছে ভাৰতীয় আকাশমাৰ্গ সুৰক্ষিত কৰা আৰু যুদ্ধৰ সময়ত বিমান যুদ্ধ চলোৱা। ১৯৩২ চনৰ ৮ অক্টোবৰত ভাৰতীয় বায়ুসেনাক আনুষ্ঠানিকভাৱে ব্ৰিটিছ সাম্ৰাজ্যৰ সহায়ক বায়ুসেনা হিচাপে প্ৰতিষ্ঠা কৰা হয়। বৰ্তমান ভাৰতীয় বায়ুসেনাত ১৭০,৫৭৬ জন সক্ৰিয় জোৱান আছে। ভাৰতীয় বায়ুসেনাই ১৯৫০ চনৰ পৰা চুবুৰীয়া দেশ পাকিস্তানৰ সৈতে ৪খন যুদ্ধত জড়িত হৈ আছে। আজি ‘অপাৰেচন বিজয়’, ‘অপাৰেচন মেঘদূত’, ‘অপাৰেচন কেকটাছ’ আৰু ‘অপাৰেচন পুমলাই’ ভাৰতীয় বায়ুসেনাৰ পৰিচয় হৈ পৰিছে।
এয়াৰ চিফ মাৰ্শ্বালক ‘ভাৰতীয় বায়ুসেনা’ৰ মুৰব্বী হিচাপে গণ্য কৰা হয়, যি এজন চাৰি তাৰকা বিষয়া। বায়ুসেনাৰ প্ৰায়বোৰ অপাৰেচনেল কমাণ্ডৰ দায়িত্ব ‘এয়াৰ চিফ মাৰ্শ্বাল’ৰ। ২০০২ চনৰ ২৬ জানুৱাৰীত ভাৰতৰ ৰাষ্ট্ৰপতিয়ে বায়ুসেনাৰ ‘মাৰ্শ্বাল’ পদ প্ৰদান কৰা ভাৰতীয় বায়ুসেনাৰ ইতিহাসত অৰ্জন সিং একমাত্ৰ বিষয়া। ভাৰতীয় বায়ুসেনাৰ (আই এ এফ) প্ৰথম আৰু একমাত্ৰ ফাইভ ষ্টাৰ ৰেংক অফিচাৰ অৰ্জন সিং।
দৰাচলতে ১৯৪৭ চনত ভাৰত স্বাধীন হোৱাৰ পাছত ভাৰতীয় বায়ুসেনাক ‘ৰয়েল ইণ্ডিয়ান এয়াৰ ফৰ্চ’ নামেৰে নামাকৰণ কৰা হৈছিল। কিন্তু ১৯৫০ চনত গণৰাজ্যলৈ পৰিৱৰ্তিত হোৱাৰ লগে লগে ইয়াৰ নামৰ পৰা ‘ৰয়েল’ শব্দটো বাদ পৰিল। ইয়াৰ পিছত ভাৰতীয় বায়ুসেনা (IAF) নামটোৰ অস্তিত্ব আহিল। কিন্তু এতিয়া আকৌ এবাৰ সলনি হ’বলৈ গৈ আছে ‘ভাৰতীয় বায়ুসেনা’ৰ নাম।
সংবাদ মাধ্যমৰ বাতৰি অনুসৰি অহা কেইবছৰমানৰ ভিতৰত ভাৰতীয় বায়ুসেনাৰ নাম সলনি হ’বলৈ গৈ আছে। ইয়াৰ নাম ভাৰতীয় বায়ুসেনাৰ পৰা ভাৰতীয় বায়ু আৰু মহাকাশ বাহিনীলৈ সলনি হ’বলৈ গৈ আছে। ভাৰত চৰকাৰে হয়তো অতি সোনকালে এই নামত অনুমোদন দিব।
দৰাচলতে ভাৰতীয় বায়ুসেনাই কেৱল বিশ্বৰ এক শক্তিশালী বায়ুসেনা হিচাপেই নহয়, নিৰ্ভৰযোগ্য মহাকাশ শক্তি হিচাপেও পৰিচিত হ’ব বিচাৰে। সেইবাবেই ভাৰতীয় বায়ুসেনাইও শীঘ্ৰে সম্পূৰ্ণ সামৰ্থ্য আৰু স্বাধীনতাৰে সিদ্ধান্ত ল’ব পৰা ‘স্পেচ কমাণ্ড’ সৃষ্টিৰ প্ৰস্তুতি চলাইছে। এই সময়ছোৱাত ভাৰতীয় বায়ুসেনাৰ নিজা ১০০টা উপগ্ৰহ মহাকাশত নিয়োজিত হ’ব।
0 Comments:
Post a Comment