কিছুমানে দাবী কৰে যে খাদ্যৰ লগত পানী খোৱাটো আপোনাৰ হজম শক্তিৰ বাবে বেয়া। কোৱা হয় যে ইয়াৰ দ্বাৰা বিষাক্ত পদাৰ্থ জমা হ’ব পাৰে, যাৰ ফলত বহুতো স্বাস্থ্যজনিত সমস্যাৰ সৃষ্টি হ’ব পাৰে। কিন্তু প্ৰশ্ন হয়, খাদ্যৰ লগতে পানী খোৱাটোৱে সঁচাকৈয়ে আপোনাৰ স্বাস্থ্য আৰু হজম শক্তিৰ ওপৰত নেতিবাচক প্ৰভাৱ পেলাব পাৰেনে আৰু কোনো গৱেষণাই এই কথা প্ৰমাণ কৰিছেনে?
আজি এই বিষয়ে কওঁ-
আমাৰ শৰীৰৰ পাচন প্ৰক্ৰিয়া কি?
খাদ্য চোবাই আৰম্ভ কৰাৰ লগে লগে মুখত হজম শক্তি আৰম্ভ হয়। চোবাই খালে মুখত লালা উৎপন্ন হয়, য’ত এনজাইম থাকে যিয়ে খাদ্য ভাঙি পেলোৱাত সহায় কৰে। খাদ্য এবাৰ পেটত প্ৰৱেশ কৰিলেই এচিডিক গেষ্ট্ৰিক ৰসৰ লগত মিহলি হৈ ইয়াক আৰু অধিক ভাঙি চাইম নামৰ ডাঠ তৰল পদাৰ্থৰ সৃষ্টি কৰে। ক্ষুদ্ৰান্ত্ৰত থকা চাইম আপোনাৰ অগ্নাশয়ৰ পৰা পাচন এনজাইম আৰু যকৃতৰ পৰা পিত্ত এচিডৰ সৈতে মিহলি হয়। এইবোৰে চিমবোৰ আৰু বেছি ভাঙি পেলায়। তাৰ পিছত পুষ্টিকৰ পদাৰ্থবোৰ তেজত শোষণৰ বাবে প্ৰস্তুত কৰা হয়।
ক্ষুদ্ৰান্ত্ৰৰ মাজেৰে চাইম যাত্ৰা কৰাৰ লগে লগে বেছিভাগ পুষ্টিকৰ পদাৰ্থ শোষিত হয়। এবাৰ ই আপোনাৰ বৃহদান্ত্ৰত উপনীত হ’লে মাত্ৰ এটা সৰু অংশহে শোষণ কৰিবলৈ বাকী থাকে। যেতিয়া সকলো পুষ্টিকৰ পদাৰ্থ ৰক্ত সঞ্চালনৰ জৰিয়তে গোটেই শৰীৰত উপনীত হয়, তেতিয়া বাকী থকা পদাৰ্থবোৰ শৰীৰৰ পৰা আঁতৰাই পেলোৱা হয়। এই পাচন প্ৰক্ৰিয়াত ২৪ৰ পৰা ৭২ ঘণ্টা সময় লাগিব পাৰে। কিমান সময় লাগিব সেয়া নিৰ্ভৰ কৰে আপুনি কি খাইছে তাৰ ওপৰত।
খাদ্যৰ লগত পানী খোৱাটো ভাল বা বেয়া
খাদ্যৰ লগত পানী খোৱাটো ক্ষতিকাৰক নেকি?
খাদ্যৰ লগতে পানী খোৱাৰ ফলত হজম শক্তিৰ ওপৰত নেতিবাচক প্ৰভাৱ পৰে বুলি বিশ্বাস কৰা হয়। কোৱা হয় যে খাদ্য খোৱাৰ ত্ৰিশ মিনিট আগতে আৰু ত্ৰিশ মিনিট পিছত এগিলাচ পানী খাব লাগে। খাদ্য খোৱাৰ সময়ত পানী খালে খাদ্য সঠিকভাৱে ভাঙি নাযায় আৰু ইয়াৰ শোষণো সঠিকভাৱে নহয়।
কোৱা হয় যে পাচনৰ সময়ত পেটত থকা এচিডে আমি খোৱা খাদ্য ভাঙি পেলোৱাত সহায় কৰে। কিন্তু খাদ্যৰ লগত পানী খালে পেটত থকা এচিড পাতল কৰি পেলায়। ইয়াৰ ফলত হজম শক্তিৰ ওপৰত বেয়া প্ৰভাৱ পৰে আৰু খাদ্য খুব কম সময়ৰ বাবে পেটৰ এচিড আৰু এনজাইমৰ সংস্পৰ্শত থাকে।
কিন্তু ইয়াৰ বাহিৰেও বহু গৱেষণাৰ পৰা দেখা গৈছে যে খাদ্য খোৱাৰ সময়ত আৰু খোৱাৰ পিছত পানী খালে হজম শক্তিত কোনো প্ৰভাৱ নপৰে। খাদ্য খোৱাৰ সময়ত পানী খালে এচিডিটিৰ সমস্যা হয় বুলিও বহুতে বিশ্বাস কৰে। অৱশ্যে এই সন্দৰ্ভত এতিয়ালৈকে কোনো সুনিৰ্দিষ্ট তথ্য লাভ কৰা হোৱা নাই।
গতিকে আমি খাদ্যৰ লগত পানী খাব লাগে নে নাই?
সত্যটো হ’ল এতিয়ালৈকে কোনো গৱেষণাত প্ৰমাণিত হোৱা নাই যে খাদ্য খোৱাৰ সময়ত বা খোৱাৰ আগতে আৰু খোৱাৰ পিছত পানী খালে হজম শক্তিত কোনো সমস্যাৰ সৃষ্টি হয়। নতুবা খাদ্যৰ লগতে পানী খোৱাৰ ফলত হজম শক্তি, পেটৰ এচিড আৰু এনজাইমৰ ওপৰত বেয়া প্ৰভাৱ পৰে বুলি কোনো গৱেষণাত প্ৰমাণিত হোৱা নাই।
এনে পৰিস্থিতিত খাদ্যৰ লগত পানী খাব লাগে নে নাই সেয়া নিজৰ অভিজ্ঞতাৰ ওপৰত নিৰ্ভৰ কৰে। যদি খাদ্যৰ লগত পানী খালে বিষ হয়, পেট ফুলা অনুভৱ হয় বা গেষ্ট্ৰিক ৰিফ্লাক্স বেয়া হয়, তেন্তে খাদ্য খোৱাৰ আগতে বা মাজত পানী খোৱাৰ পৰা বিৰত থাকক। অন্যথা খাদ্য খোৱাৰ সময়ত পানী খোৱাৰ পৰা বিৰত থকা উচিত বুলি কোনো কঠিন প্ৰমাণ পোৱা নাযায়।
আহাৰ খোৱাৰ আগতে আৰু মাজত অলপ পানী খোৱাটো আপোনাৰ হজম প্ৰক্ৰিয়াৰ বাবে ভাল বুলি বিশ্বাস কৰা হয়। আনকি আয়ুৰ্বেদতো খাদ্যৰ সময়ত পানীৰ এধক এধকৈ খোৱাটোৱেই উত্তম বুলি কোৱা হয়। ই খাদ্যৰ ডাঙৰ ডাঙৰ টুকুৰা ভাঙি পেলোৱাত সহায় কৰে, যাৰ বাবে পাচনতন্ত্ৰই খাদ্য সহজে হজম কৰে।
0 Comments:
Post a Comment